Moda e Museos!!

Na miña última visita a Madrid, fai xa un tempiño, non perdín a ocasión de visitar algúns museos, como non podía ser doutra maneira, sempre o fago cando viaxo...chámalle manía!! ;)

Pois ben, un dos que visitei ese intenso fin de semana foi o Museo Nacional do Traxe, e pareceume unha marabilla. O primeiro que me chamou a atención: o edificio, esperaba atoparme con un edificio antigo, clásico, pero ó contrario, atopeime cunha  arquitectura contemporánea que ademáis resulta estéticamente atemporal. Como a min tan importante me parece o contido como o contenedor quixen saber máis sobre este edificio, consultei en internet e descubrín que o edificio se construíu nos anos 70 co fin de albergar unhas coleccións de traxes históricos con máis de un século de historia.  Entón aquí se asentou a sede deste museo no que se leva a cabo unha importante labor de investigación sobre o tema da moda e a súa evolución.

A exposición permanente que acolle o museo fai un gran percorrido pola historia da moda en España dende o século XVI ata a actualidade. Inclúe ademais ó comezo do percorrido unha mostra de traxes rexionais. conta cunha sección para exposicións temporais, xusto cando eu pasei por alí presentabase unha pequena mostra de tocados moi chulos e curiosos dos que saquei algunha foto.

A mostra está perfectamente organizada para que vaiamos vendo como foi a evolución da forma de vestir dos españois durante eses cinco séculos, algo que me parece interesantísimo. Temos que pensar que a forma de vestir, a moda, é sempre unha forma de expresión que nos fala de diferenzas sociais, económicas e culturais entre persoas e entre estamentos. Por exemplo, nos tempos en que a sociedade se dividía entre señores e criados, ós criados non se lles permitía vestir como os señores, impúñaselles unha forma de vestir humilde e sinxela sen ornamentos, sen complementos e sen xoias. Esto foi así durante moito tempo, pero no século XX as cousas foron cambiando, e aínda que segue habendo diferenzas entre como nos vestimos os ricos e os menos ricos, en xeral a moda foise democratizando e todos podemos vestir o que queiramos sempre e cando nolo poidamos permitir económicamente.

Entón, volvendo á este estupendo museo, mentres se fai o recorrido da expo podes ir admirando preciosos traxes, vestidos, complementos, zapatos ou xoias de diferentes épocas, semella que estás a visitar uns grandes almacéns que mostran nas súas vitrinas os maniquis  cos últimos modelos á venda, pero sen as etiquetas dos prezos claro!. A verdade é que podemos ver traxes e vestidos que son auténticas preciosidades, unha mostra espectacular que se ocupa da vestimenta tanto de homes como de mulleres. Pero o tema da evolución da moda feminina sempre chama máis a atención, polo percorrido imos entendendo como foi evolucionando a forma de vestir da muller nestes cinco séculos, e vemos vestidos de telas marabillosas e preciosos adornos con bordados, encaixes ou puntillas, con grandes volumes, corsés e miriñaques, auténticas armaduras tecidas de arames, cos que se tentaba ocultar ou modificar á vista as formas naturais do corpo feminino. Durante moito tempo empregouse a moda como un modo máis de opresión sobre as mulleres, elas debían estar bonitas pero non cómodas, lucir unhas roupas que parecen máis pensadas para expoñer como obras de arte, que hoxe nos resulta dificil facernos á idea de vestirse con esas prendas. Facíanas sentir sobre os seus corpos a opresión á que as sometía a sociedade machista na que vivían.

Avanzando no tempo, e na mostra, comprobamos como a vestimenta se foi alixeirando, as prendas interiores mais opresivas van desaparecendo e os vestidos deixan intuir as formas do corpo, resultando pouco a pouca máis naturais e cómodos. Os vestidos foron liberando o corpo da muller ó mesmo tempo que as mulleres se foron liberando da opresión social. E chegando á parte final, que se corresponde coas ultimas décadas do XX e a actualidade, o nacemento da Alta Costura e os grandes modistos nacionais representados aquí por deseños de Pertegaz ou Balenciaga entre outros,e incluso Paco Rabanne, quenes o que que queren é mostrar a beleza da muller e realzar a figura feminina a través das súas creacións.

Para rematar a visita pasamos por unha sección na que xogar e ó mesmo tempo aprender. Por exemplo, a través dos sentidos aprendemos a diferenciar teas e texturas, ou experimentar outras sensacións, podemos sacarnos fotos con diferentes looks, etc.

Se queredes ver e saber máis non perdades a ocasión de pasar por aquí. Hoxe que tanto están de moda @s influencers, as it girls ou os bloggers de moda, este é un museo perfecto e de visita obrigada para toda esta xente tan interesada na moda onde poden aprender de historia, e quen sabe si de aquí poden sacar a inspiración para algún dos seus estilismos... ;)